जाजरकोट । नेकपा एमालेका उपमहासचिव प्रदिप ज्ञवालीले कर्णाली सरकार गठनमा माओवादी केन्द्रको अनावश्यक बखेडा झिकेको बताएका छन । वर्तमान सत्ता गठबन्धनको शिर्ष नेतृत्वमा कर्णाली प्रदेश सरकाको नेतृत्व एमालेले गर्ने र मन्त्रालयको भागबण्डा आपसी समझदारीमा टुंगो लगाउने सहमति भएपनि कर्णालीमा माओवादीले अनावश्यक रुपमा सभामुखको विषयलाई समेत जोडेर बखेडा झिकेकोले सरकार गठनमा ढिलाई भएको उपमहासचिव ज्ञवालीले बताए ।
एमाले जाजरकोटको ७ औं जिल्ला अधिवेशनलाई आइतबार सदरमुकाम खलंगामा सम्बोधन गर्दै नेता ज्ञवालीले वर्तमान सत्ता गठबन्धन राष्ट्रको हितमा बनेको भन्दै आवद्ध दलहरु भने सच्चिन आवश्यक भएको बताए । पूर्वमन्त्री समेत रहेका ज्ञवालीले नेपाललाई अल्पविकसित राष्ट्रको सूचिबाट विकासशिल राष्ट्रको सूचिमा एमाले नेतृत्वको सरकारले पुर्याएको दावि गरे । केपी ओली नेतृत्वको सरकारको पालामा देश विकासले गति लिएको र जनतामा आशा जगाएको भन्दै षडयन्त्रपूर्वक सरकारबाट हटाइएको उनको भनाई छ ।
उपमहासचिव ज्ञवालीको प्रमुख आतिथ्यतामा एमाले जाजरकोटको ७ औं जिल्ला अधिवेशन आज उद्घाटन भएको छ । उद्घाटन कार्यक्रममा पार्टी सचिव एवम् कर्णाली प्रदेश इन्चार्ज लेखराज भट्ट, पोलिटव्युरो सदस्य एवम जाजरकोट जिल्ला इन्चार्ज लक्ष्मी प्रसाद पोखरेल, पोलिटव्युरो सदस्य भैरवसुन्दर श्रेष्ठ, कर्णाली प्रदेश कमिटी अध्यक्ष गुलावजंग शाह, केन्द्रीय सदस्यहरु निरज आचार्य, डम्बर बहादुर सिंह, चन्द्रप्रकाश घर्ती लगायतको उपस्थिति रहेको थियो ।
मंगलबारसम्म चल्ने अधिवेशनको बन्दसत्र सोमबार बिहान ७ बजेबाट सुरु हुने प्रचार तथा प्रकाशन विभाग प्रमुख नरबहादुर बस्नेत (एन.बि) ले जानकारी दिए । एमाले जाजरकोटको नयाँ नेतृत्वका लागि हालसम्म वर्तमान अध्यक्ष खिमबहादुर शाही र युवा नेता नरेन्द्र कुमार शाहीको चर्चा रहेको छ ।
