जाजरकोट । नेकपा एमाले जाजरकोटले जिल्ला कमिटीको अधिवेशनको मिति तोकेको छ । जिल्ला सदरमुकाममा सम्पन्न जिल्ला कमिटीको १२ औं पूर्ण बैठकले चैत्र २५, २६ र २७ गते खलंगामा जिल्ला कमिटीको अधिवेशन सम्पन्न गर्ने निर्णय गरेको हो ।
पार्टीका पोलिटब्यूरो सदस्य एवं जिल्ला ईन्चार्ज लक्ष्मीप्रसाद पोखरेल, पोलिटब्यूरो सदस्य भैरवसुन्दर श्रेष्ठ, केन्द्रीय सदस्यहरु निरज आचार्य, डम्बर बहादुर सिंह लगायतका नेताहरुको उपस्थितिमा बसेको बैठकले पार्टीको ७ औं जिल्ला अधिवेशनको मिति तय गरेको प्रचार विभाग प्रमुख समेत रहेका उपसचिव नरबहादुर बस्नेत (एनबि) ले बताए ।
बस्नेतका अनुसार अधिवेशनमा भुगोल, समावेशी र जनसंगठनबाट प्रतिनिधित्व हुने गरी करिव ४ सय प्रतिनिधि सहभागी हुनेछन ।
अधिवेशनको उद्घाटन पार्टी केन्द्रीय अध्यक्ष केपी शर्मा ओलीले गर्ने तय भएको छ । अधिवेशन उद्घाटनका लागि पूर्व प्रधानमन्त्री एवम् पार्टी अध्यक्ष ओलीलाई आमन्त्रण गर्ने निर्णय भएको जिल्ला पार्टी अध्यक्ष खिमबहादुर शाहीले जानकारी दिए ।
