गाजापट्टी २६ असोज । प्यालेस्टाइनी हमासले इजरायली हवाई आक्रमणमा १३ जना बन्धक मारिएको दाबी गरेको छ ।
हमासको सैन्य शाखाका अनुसार गाजापट्टीमा इजरायली हवाई आक्रमणमा पछिल्लो २४ घण्टामा कम्तीमा १३ इजरायली र विदेशी बन्धक मारिएका छन् ।
‘इजरायललाई आफ्नो नागरिक प्रति कुनै संवेदनशील छैन, उसले हवाई हमलामार्फत आफ्नै नागरिक र विदेशीहरूको हत्या गरेको छ,’ हमासका सैन्य कमान्डरले भनेका छन् । हमासको विज्ञप्ति अनुसार गाजाका पाँच स्थानमा यी व्यक्तिहरूको मृत्यु भएको हो । गत अक्टोबर ७ मा हमासले इजरायलमा आक्रमण गर्दा १५० जनालाई अपहरण पनि गरेर प्यालेस्टाइनी भूमितर्फ लगेको थियो ।
साथै, हमासले इजरायलमा फेरी रकेट प्रहार गरेको छ । टाइम्स अफ इजरायलका अनुसार हमासले इजरायली सहर अस्केलोनमा १५० रकेट प्रहार गरेको छ । अश्कलोनबाट प्राप्त तस्बिरहरूमा रकेटहरू खसेको देख्न सकिन्छ। हमासले आक्रमण गर्नुअघि सहरमा साइरन पनि बजिरहेको सो मिडियाले जनाएको छ ।
उता, जारी युद्ध रोकिने कुनै छाँटकाँट नदेखी रहेको बेला इजरायली ट्याङ्कहरू गाजा सीमातर्फ अघि बढिरहेको जनाइएको छ । इजरायली सेनाले गाजापट्टी नजिक ३ लाख सैनिक तैनाथ गरेको छ । अहिले क्रमशः ट्याङ्क पनि यही दिशामा पठाइँदै छ । इजरायली सेनाले स्पष्ट रूपमा हमासलाई समाप्त गर्ने बताए पछि आक्रामक रूपमा इजरायल युद्धमा उत्रेको छ ।
