काठमाडौँ, कार्तिक ९ । पूर्व प्रधानमन्त्री तथा नेपाल समाजवादी पार्टीका अध्यक्ष बाबुराम भट्टराई लोकतन्त्रको विकल्प अझ उन्नत लोकतन्त्र हो भन्दै एउटा ट्विट जारी गरेका छन् । उनले भनेका छन्, ‘भनिन्छ- समाजमा पश्चगामी/रूढीवादी चेतना भएका मानिस ५% जति हुन्छन्; अग्रगामी/वैज्ञानिक चेतना भएका मानिस १०-१५% जति हुन्छन्; कुनै प्रस्ट चेतना नभएका ढुलमुल/मध्यवर्ती मानिस ८०% जति हुन्छन्।त्यसैले जहिल्यै अग्रगामी चेतना भएका मानिसले मुठ्ठीभर प्रतिगामी शक्तिहरू जसलाई पुरानो सत्ता र परम्पराको लाभ हुन्छ तिनका विरुद्ध दरो मोर्चा कसेर बहुसङ्ख्यक मध्यवर्ती वा ढुलमुल जनतालाई तिनको भ्रम जालबाट मुक्त गर्नुपर्छ र निरन्तर उन्नत लोकतन्त्र,समानता र समृद्धिको मार्गमा अगुवाइ गर्नुपर्छ।आजसम्मको विश्व इतिहासको प्रगतिको नियम यही हो; नेपाल त्यसको अपवाद हुन सक्दैन। स्मरण रहोस्, इतिहास बगेको पानी झैँ निरन्तर अघि बढ्छ,पछि फर्कँदैन । लोकतन्त्रको विकल्प अझ उन्नत समावेशी र सहभागितामूलक लोकतन्त्र हो; कुनै पनि प्रकारको निरङ्कुशतन्त्र र राजतन्त्र हैन। लोकतन्त्रले बेलाबखत देखा पर्ने खराब शासकहरूलाई लोकतान्त्रिक तरिकाबाटै हटाएर जनतालाई राहत दिन सक्छ तर निरङ्कुशतन्त्र र राजतन्त्रले सक्दैन! त्यसैले अहिलेका शासक भ्रष्ट र खराब भए भन्दैमा लोकतन्त्रलाई नै मास्ने वा कमजोर पार्ने गल्ती नगरौँ। भ्रष्ट र खराब नेता/पार्टी फालौँ; असल नेता/पार्टी रोजौँ वा बनाऔँ।कराहीबाट उम्केर भुङ्ग्रोमा हाम फाल्ने गल्ती नगरौँ। भोक लाग्यो भन्दैमा विषाक्त भोजन सेवन गर्ने गल्ती नगरौँ ।’
