कात्तिक २५, काठमाडौं । नेपाली काँग्रेसले जाजरकोट सहितको भूकम्प प्रभावित क्षेत्रमा मङ्सिर मसान्तभित्र अस्थायी आवास निर्माणको काम सम्पन्न गरिसक्न सरकारलाई सुझाव दिएको छ ।
भूकम्प प्रभावित क्षेत्रको स्थलगत अवलोकन गरी फर्केको काँग्रेस महामन्त्रीद्वय गगनकुमार थापा र विश्वप्रकाश शर्माको टोलीले आज प्रधानमन्त्री पुष्पकमल दाहाल प्रचण्डलाइ भेटेर ११ बुँदे ध्यानाकर्षण पत्र बुझाउँदै सो सुझाव दिएको हो ।
पुषको जाडोमा पीडितहरूको अवस्था भयावह हुने भएकाले अस्थायी आवास निर्माणको काम मङ्सिर भित्र सम्पन्न गरिसक्न प्रधानमन्त्रीलाई सुझाव दिएको काँग्रेस महामन्त्री थापाले बताए ।
स्थायी रूपमा सिकाई केन्द्रहरू बनाएर भूकम्प प्रभावित क्षेत्रका बालबालिकाहरूको पठनपाठनको आवश्यक व्यवस्था मिलाउन पनि सरकारको ध्यानाकर्षण गराइएको बताए ।
महामन्त्री थापाले अस्थायी आवास निर्माणको जिम्मेवारी प्रदेश सरकार र स्थानीय सरकारलाई दिन र त्यसका लागि आवश्यक रकम नागरिकको हातमा तत्काल पुग्ने गरी आवश्यक व्यवस्था गर्न मन्त्रिपरिषद् बैठक बोलाउन पनि सरकारसँग माग गरिएको बताए ।
टोलीले अस्थायी आवास निर्माणका लागि जनशक्तिको अभाव पूर्तिका लागि सरकारले राजनीतिक दलहरू र संघ, संस्थाहरूसँग मिलेर काम गर्नुपर्ने पनि औँल्याएको छ ।
महामन्त्री थापाले भने, ‘अब जाडो सुरु भइसकेको छ, अस्थायी टहरा बनाउने काम त्यहाँ करिब करिब ५०÷६० हजार बनाउनुपर्नेछ, किनकि त्यति धेरै घरहरू बस्न नमिल्ने अवस्थामा छन् ।
त्यो अस्थायी टहरा बनाउने काम हामीले मङ्सिरको महिनाभित्र यदि सम्पन्न गर्न सकेनौँ भने पुसको जाडो यो त्रिपालले थेग्नै सक्दैन । र, यसले यति ठुलो भयावह स्थितिको सृजना गर्छ । त्यसका लागि अस्थायी टहरा बनाउने कुरा अहिलेका लागि सबैभन्दा महत्त्वपूर्ण कुरा छ ।’
नेता थापाले भूकम्प प्रभावित क्षेत्रमा गएर आफैँले हेरेको समेत स्मरण गरे । उनले प्रधानमन्त्री प्रचण्डसँग भेटेर त्यसबारेमा छलफल गरेको र तिहारकै बीचमा मन्त्रिपरिषद्ले निर्णय गरेर काम सुरु गर्न सुझाव दिएको बताए ।
उनले भने,‘हामीले प्रधानमन्त्रीजीलाई तिहारकै बीचमा मन्त्रिपरिषद्ले निर्णय गरेर काम सुरु गर्नुप¥यो भनेका छौँ । प्रदेश सरकार र स्थानीय सरकार छ । तलको काम उहाँहरूले गर्नुहुन्छ । अभाव दुईवटा कुराको हुन सक्छ । एउटा, ठुलो सङ्ख्यामा जस्तापाता चाहिने भएकाले बजारमा त्यो पाउने सुनिश्चितता गरिदिनुपर्छ ।
