८ पौष, काठमाण्डौं – नेकपा (एमाले)का अध्यक्ष तथा पूर्वप्रधानमन्त्री केपी शर्मा ओलीले संघीय शासन प्रणालीलाई सफल बनाउने कोसिसमा लाग्नुपर्ने बताएका छन् ।
१४ मंसिरदेखि १८ दिनसम्म चलेको बैतडीको झुलाघाटदेखि पाँचथरको चिवाभन्ज्याङसम्मको समृद्धिका लागि संकल्प यात्राबारे जानकारी दिन पार्टी केन्द्रीय कार्यालय च्यासल, ललितपुरमा आइतबार आयोजित पत्रकार सम्मेलनमा ओलीले उक्त कुरा बताएका हुन् ।
ओलीले भने ‘संघीयतालाई सफल ढंगले कार्यान्वयन गरी मजबुद र सफल बनाउन कोसिस गर्नुपर्छ, अहिलेको चरण त्यो हो,’ ।
संघीयताका संरचनाहरूले विकास निर्माणका कामहरूको अगुवाइ गर्नुपर्ने ओलीको भनाइ थियो । उनले भ्रष्टाचार नियन्त्रण गरेर संघीय संरचनामाथि प्रश्न उठ्न नदिनु आवश्यक रहेको पनि स्पष्ट पारे । प्रदेश संरचना कार्यान्वयन र अभ्यासका क्रममा प्रश्न उठाउने काम भइरहेको भन्दै उनले असन्तुष्टि व्यक्त गरेका थिए ।
ओलीले प्रदेशको नाम र अधिकार लगायतका विषय प्रश्न उठाएर झमेला गर्न खोजिएको पनि बताए । ती प्रश्नको निराकरणका लागि राज्यको नेतृत्वमा रहेका व्यक्तिहरूले गम्भीरतापूर्वक छलफल गर्नुपर्ने उनको भनाइ थियो । ‘संघीयतालाई लिएर दुईवटा अतिमा दौडिनुहुन्न । खारेज भइहाल्नुपर्यो भन्ने अतिमा पनि दौडिनुहुन्न र अर्कोतिर संघमा भएका अधिकार तथा संरचना प्रदेशमा पठाउनुपर्छ भनेर सम्हाल्नैं नसक्ने खालको स्थिति पनि हुनुहुन्न,’ उनले भने । पछिल्लो समय विद्यालय र अस्पताललगायतका संरचना संचालनमा समस्या देखिएको उनले उल्लेख गरेका थिए ।
राज्यलाई कमजोर पार्नका लागि प्रश्न उठ्ने गरिएको पनि ओलीको भनाइ थियो । नेपालको संघीयता शक्ति विकेन्द्रीकरण नभई शक्तिको बाँडफाँटको आधारमा रहेको उनले बताए । देशको विकास र जनताको सुविधाका लागि नेपालको संघीयता रहेको उनको भनाइ थियो ।
