जाजरकोट । जाजरकोटमा बृहत स्थानीय झाँकी प्रदर्शनी गरिएको छ । पछिल्लो समय स्थानीय कला संस्कृतिहरु लोप हुँदै गएकाले तिनको संरक्षण गरी लोप हुन नदिन जाजरकोट सम्पदा संरक्षण प्रतिष्ठानको आयोजनामा बृहत स्थानीय झाँकी प्रदर्शनी गरिएको हो ।
लोपोन्मुख हुँदै गएका कला संस्कृतिलाई संरक्षण र आधुनिक कला संस्कृतिलाई व्यवस्थित गर्ने उद्देश्यले बृहत स्थानीय झाँकी प्रदर्शनी गरिएको प्रतिष्ठानका अध्यक्ष जनक केसीले बताए । जिल्लाभित्र रहेका ऐतिहासिक सोरठी, पैसेरी, सिंगारु, खाडो जस्ता नाँच तथा टप्पा, ठाडीभाका लगायतका गीतहरुको संरक्षण गर्न प्रतिष्ठानको दोश्रो वार्षिकोत्सवमा स्थानीय झाँकीको प्रदर्शनी राखिएको अध्यक्ष केसीको भनाई छ ।
‘पछिल्लो समय युवापुस्ताले परम्परागत संस्कृति बिर्सदै गएका छन, यसलाई बचाउन आवश्यक छ, केसीले भने, यस्ता लोप हुदै गएका संस्कृतिलाई बचाउनको लागि जिल्ला स्तरिय बृहत स्थानीय झाँकी प्रदर्शनी गरिएको हो ।’
पहिलो पटक गरिएको जिल्ला स्तरीय बृहत स्थानीय झाँकी प्रदर्शनीमा जिल्लाका ७ वटै पालिकाबाट विभिन्न प्रस्तुति राखिएको थियो ।
