दैलेख । नेकपा एमाले दैलेख जिल्ला कमिटीको अध्यक्षमा सूर्यबहादुर शाही निर्वाचित भएका छन । एमालेको आठौँ जिल्ला अधिवेशनले शाहीको नेतृत्वमा ९१ सदस्यीय जिल्ला कमिटी सर्वसम्मत निर्वाचित गरेको हो ।
अधिवेशनले उपाध्यक्षमा प्रेमबहादुर बुढा, सचिवमा हिमालय जङ्ग शाह तथा उपसचिवमा मीन बहादुर बुढा क्षेत्री र तारा सोनीलाई निर्वाचित गरेको पार्टी प्रदेश कमिटी उपसचिव रबिन्द्रराज शर्माले जानकारी दिए ।
जिल्ला अध्यक्षका लागि चारजना आकांक्षी रहेको भएपनि अन्तत शाही अध्यक्षमा सर्वसम्मत भए । अध्यक्षका आकांक्षी तिलकप्रसाद रिजाल, नन्दकिशोर बस्नेत र प्रेमबहादुर बुढाले उम्मेदवारी फिर्ता लिएपछि शाही सर्वसम्मत अध्यक्ष निर्वाचित भएका हुन ।
अध्यक्षमा निर्वाचित शाही अघिल्लोपटक रवीन्द्रराज शर्मासँग पराजित भएका थिए । जिल्ला विकास समितिका पूर्व उपसभापति शाही जिल्लाको राजनीतिमा इमानदार, त्यागी र बौद्धिक व्यक्तिको चिनिएका नेता हुन ।
नेताहरुको लामो प्रयासपछि सहमति जुटेको प्रदेश कमिटी उपसचिव शर्माले जानकारी दिए । ‘जिल्लाका नेता तथा कार्यकर्ताको चाहाना सहमति नै थियो, त्यही आग्रह अनुसारनै सर्वसम्मत नयाँ नेतृत्व चयन गरेका छौं ।’ उनले भने ।
पदाधिकारी संगै ९१ सदस्यीय जिल्ला कमिटी नै सर्वसम्मत रुपमा निर्वाचित भएको एमाले दैलेखले जनाएको छ ।
