सुर्खेत । नेपाली सेनाले वीरेन्द्रनगरमा एकताको लागि दौडको नाम दिएर दौड प्रतियोगिताको आयोजना गर्ने भएको छ । बुधबार पत्रकार सम्मेलनको आयोजना गरी सेनाले दौड प्रतियोगिता गर्न लागेको जनाएको छ ।
राष्ट्रिय एकताको भावना अभिवृद्धि तथा सेनाद्वारा विगतमा आयोजना गरिएको ‘रन फर युनिटी’ कार्यक्रमलाई निरन्तरता दिदै सेनाले लामो दुरिको दौड प्रतियोगिता आयोजना गरेको छ । १२ फागुनमा शनिबारका दिन वीरेन्द्रनगरमा आयोजित दौड प्रतियोगितामा खासगरी पाँच किलोमिटर र १० किलोमिटरका दौड प्रतियोगिताहरु हुने बताइएको छ ।
पाँच किलोमिटर दूरिको वाकाथन’ दौड प्रतियोगितामामा सरकारी कर्मचारी, प्रदेश सरकार तथा स्नानीय तहका पदाधिकारी, नेपाली सेनाका सकलदर्जा, संघसंस्थाका प्रतिनिधि, सुरक्षाकर्मी, स्थानीय नागरिक लगायतको सहभागिता आह्वान गरिएको छ । यसैगरी १२ कक्षासम्म अध्ययनरत विद्यार्थीका लागि महिला र पुरुष गरी छुट्टाछुट्टै पाँच किलोमिटर दूरिको दौड प्रतियोगता रहेको छ ।
१० किलोमिटरको दौडतर्फ पुरुष र महिलाका लागि छुट्टाछुट्टै प्रतियोगिता आयोजना हुने सेनाले जनाएको छ । प्रतियोगितामा एक हजारजनाको सहभागिता रहने अपेक्षा गरिएको सेनाको भनाई छ । वीरेन्द्रनगर स्थित खुल्ला मञ्चमा आयोजना हुने दौड प्रतियोगितामा सेनाका गतिविधिहरु प्रर्दशन, साँस्कृतिक कार्यक्रम, शैक्षिक सामाग्री तथा फोटो प्रर्दशनीलगायतका कार्यक्रमहरु रहेको उत्तर पश्चिम पृतना हेडक्वाटरले जनाएको छ ।
