सुर्खेत । अनेरास्ववियु कर्णाली प्रदेश कमिटीले वक्तृत्वकला र हाजिरी जवाफ प्रतियोगिताको आयोजना गर्ने भएको छ । रुकुमका पार्टी संस्थापक नेता यदु गौतमको स्मृति दिवसका अवसरमा अनेरास्ववियु कर्णाली प्रदेश कमिटीले प्रदेश स्तरिय वक्तृत्वकला तथा मावि स्तरिय हाजिरी जवाफ प्रतियोगिता संचालन गर्ने भएको हो ।
२५ औं यदु स्मृति दिवसको अवसरमा भोलि (२१ फाल्गुन) चौरजहारी नगरपालिकाको खोलागाउँमा हाजिरी जवाफ र वक्तृत्वकला प्रतियोगिताको आयोजना गर्न लागिएको अनेरास्ववियु कर्णाली प्रदेश कमिटी अध्यक्ष राजेश ओलीले जानकारी दिए । अध्यक्ष ओलीका अनुसार शिक्षित जनशक्ति विदेश पलायनबाट रोक्न राज्यले चाल्नुपर्ने कदमहरु शिर्षकमा प्रदेश स्तरिय वक्तृत्वकला प्रतियोगिता राखिएको छ ।
त्यस्तै उउटा समुहमा ३ जना सहभागि हुनेगरी मावि प्रदेश भित्रका मावि स्तरिय हाजिरी जवाफ प्रतियोगिताको आयोजना गर्न लागिएको अनेरास्ववियुले जनाएको छ । वक्तृत्वकला प्रतियोगितामा विजेता र उपविजेता हुनेलाई क्रमशः १० हजार र ५ हजार तथा हाजिरी जवाफ प्रतियोगितामा प्रथम, द्धितीय र तृतीय हुनेलाई क्रमशः ३० हजार, २० हजार र १० हजार नगद सहित पुरस्कृत गरिने छ ।
आफुहरुले माओवादीको आधार इलाका मानिएको जिल्लामा श्रृजनात्मक कार्यक्रमको आयोजना गरेर संस्थापक नेता प्रतिको सम्मान र संगठन विस्तारको अभियानलाई संस्थागत गर्न खोजेको अध्यक्ष ओलीको भनाई छ ।
उक्त कार्यक्रममा लागि सबै तयारी पुरा भएको अनेरास्ववियु कर्णाली प्रदेश कमिटी उपाध्यक्ष विवश भारतीले बताए । कार्यक्रमका लागि सबै तयारी पुरा भएको छ उपाध्यक्ष भारतीले भने, अतिथि र सहभागिहरु आउने क्रम जारी छ ।
