सुर्खेत । कर्णाली प्रदेशका नवनियुक्त ४ जना मन्त्रीले पद तथा गोपनीयताको शपथ लिएका छन । उनीहरूलाई प्रदेश प्रमुख तिलक परियारले मंगलबार शपथ खुवाएका हुन ।
शपथ लिनेमा भौतिक पूर्वाधार तथा सहरी विकास मन्त्रीमा शेरबहादुर बुढा, आर्थिक मामिला तथा योजना मन्त्री महेन्द्र केसी, सामाजिक विकास मन्त्री वीरबहादुर शाही र उद्योग, पर्यटन, वन तथा वातावरण मन्त्री दुर्ग रावत रहेका छन ।
यस्तै राज्यमन्त्री गोमता विकले पनि शपथ लिने भएकी छन । यसअघि विनाविभागिय मन्त्रीको रुपमा शपथ लिएका रनसिंह परियारलाई जनश्रोत तथा उर्जा विकास मन्त्रालयको जिम्मेवारी दिइएको छ ।
कृषि मन्त्रीमा नियुक्त भएका विनोद कुमार शाह भने शपथ ग्रहणमा उपस्थित भएनन् । भौतिक पूर्वाधार तथा सहरी विकास मन्त्रालयको दावि गरेका शाहलाई मुख्यमन्त्री कडेलले कृषि मन्त्रालयको जिम्मेवारी दिएपछि उनि रुष्ट भएका हुन ।
