जाजरकोट । नलगाड नगरपालिकाका ४ सय बढि कृषकहरुलाई कृषि सम्बन्धि व्यवसायीक तालिम दिइएको छ ।
नगरपालिकाभित्र परम्परागत रुपमा कृषि पेशामा आवद्ध कृषकहरुलाई व्यवसायीक कृषि उत्पादन र बजारीकरण सम्बन्धि ज्ञान दिने उद्देश्यले २ दिवसिय व्यवसायीक तालिमको आयोजना गरिएको हो । संघीय र प्रादेशिक कृषि अनुसन्धान केन्द्र सहित मातहतका जिल्ला कार्यालयका विज्ञहरु मार्फत उत्पादन र व्यवसायिकरण सम्बन्धी तालिम दिइएको नगरपालिकाका सूचना अधिकारी नारायण खत्रीले जानकारी दिए ।
नलगाडमा राष्ट्रिय वाणिज्य बैंकले कृषकहरुलाई सहुलियत रुपमा कृषि कर्जा प्रदान गर्दैछ ।
नगरपालिका संग भएको सम्झौता अनुरुप बैंकले दिने उक्त सहुलियत कर्जाको सहि सदुयोग होस भन्ने उद्देश्यले पनि उक्त तालिमको आयोजना गरिएको हो । कृषकहरुमा बैंकले दिने सहुलियत ऋण दुरुपयोग नहोस भन्ने चेतना अभिवृद्धिका लागि पनि सो कार्यक्रमको आयोजना गरिएको सूचना अधिकारी खत्रीको भनाई छ ।
तालिममा कर्णाली प्रदेश सरकारको भूमि व्यवस्था, कृषि तथा सहकारी मन्त्रालयका प्रदेश सचिव डा. नरहरी प्रसाद आचार्य, प्रदेश सरकारका पूर्वमन्त्री गणेश प्रसाद सिंह लगायतको उपस्थिति रहेको थियो ।
