केपी न्यौपाने, मनाघाट । नेकपा एमाले छेडागाड नगरकमिटीको अध्यक्षमा मोतिलाल ओली सर्वसम्मत निर्वाचित भएका छन । पालिकाको केन्द्र मनाघाटमा आइतबार सम्पन्न नगरकमिटीको दोस्रो अधिवेशनले ओलीको अध्यक्षतामा सर्वसम्मत रुपमा नगरकमिटी निर्वाचित गरेको हो ।
अधिवेशनले उपाध्यक्षमा भवानी प्रसाद जैसी, सचिवमा प्रेम बहादुर कार्की, उपसचिवमा गणेश थापा र तिला कुमारी खत्रीसहित ५५ सदस्यीय नगरकमिटी निर्वाचित गरेको एमाले जाजरकोटका अध्यक्ष नरेन्द्र कुमार शाहीले जानकारी दिए । अध्यक्ष शाहीका अनुसार पदाधिकारीहरु सहित सबै सदस्यहरु सर्वसम्मत रुपमा चयन भएका हुन ।
नगर कमिटीको अध्यक्षमा निर्वाचित ओली पार्टी जिल्ला कमिटीको उपाध्यक्षमा झिनो मतान्तरले पराजित भएका थिए । अधिवेशनमा पार्टी पोलिटव्युरो सदस्य एवम् जिल्ला इन्चार्ज लक्ष्मी प्रसाद पोखरेल, केन्द्रीय सदस्यहरु निरज आचार्य, डम्बर बहादुर सिंह, जिल्ला अध्यक्ष नरेन्द्र कुमार शाही सहित पार्टी प्रदेश कमिटीका सदस्यहरु र जनसंगठनका केन्द्रीय सदस्यहरुको उपस्थिति रहेको थियो ।
छेडागाड संगै एमालेको जिल्ला अधिवेशनपछि भेरी, शिवालय, कुशे र जुनिचाँदे गाउँकमिटीको अधिवेशन सम्पन्न भइसकेका छन । बारेकोट र नलगाडको पालिका अधिवेशन गर्न बाँकी रहेको एमालेले जनाएको छ ।
पालिकाहरुको अधिवेशन संगसंगै वडा अधिवेशनहरु पनि भइरहेका जिल्ला अध्यक्ष शाहीको भनाई छ ।
