पानी पिउनुस् : बिहान उठ्नासाथ एक वा दुई गिलास मनतातो पानी पिउनुपर्छ । यसले शरीर र दिमाग हाइड्रेट गर्छ र ऊर्जाशील बनाउँछ ।
व्यायाम : बिहान कम्तीमा एक घन्टा व्यायाम गर्नु राम्रो हुन्छ । व्यायाम गर्दा शरीर तन्कन्छ र दिमाग पनि तेजसँग चल्न थाल्छ । गर्मीको समयमा बिहानै मर्निङ वाकमा जानु राम्रो हुन्छ । कोठाभित्रै योग गर्न पनि सकिन्छ । डान्स गर्न पनि सक्नुहुन्छ । यसले पनि मुड फ्रेस गराउँछ ।
ध्यान : बिहान व्यायाम गरिसकेपछि कम्तीमा १० मिनेट ध्यान गर्नुस् । १० मिनेट नियमित ध्यान गर्दा तनाव, चिन्ता, एन्जाइटीलगायत समस्याबाट बच्न सकिन्छ ।
डायरीमा लेख्नुस् : हामी धेरै प्लान बनाउँछौँ, तर हतारोका कारण भोलिपल्टै बिर्सन्छौँ । बिहान उठेर नित्यकर्म गरिसकेपछि डायरी लेख्ने र योजना बनाउने कामले तपाईलाई प्रभावकारी बनाउँछ । त्यसैले बिहान आफ्नो प्लान तयार गर्नुस् । नोटबुकमा पूरै दिनका काम लेख्नुस् । यसले तपाईंको मस्तिष्कलाई पनि एक्सरसाइज गराउँछ । त्यस्तै, तपाईं हतारो नगरी योजनाबद्ध रूपमा आफ्ना काम सम्पन्न गर्नसक्नुहुन्छ ।
स्वस्थ ब्रेकफास्ट : दिनभर ऊर्जावान् बन्नका लागि बिहान नास्तामा स्वास्थ्य आहार लिन जरुरी छ । रोटी, दूध वा जुससँगै नास्ताको प्लेटमा केही प्रोटिनयुक्त आहार समावेश गर्नु राम्रो हुन्छ । जौको सातु, अन्डा, बदाम, फलफूललगायत सेवन गर्न सकिन्छ । कतिपयले बिहान नास्ता नलिई सीधै खाना खान्छन् । तर, यो राम्रो होइन । नास्ता लिने बानीले दिउँसो अत्यधिक भोजन गर्ने बानी पनि छुट्छ । सन्तुलित मात्रामा खानाले मोटोपन घट्छ, मस्तिष्क ऊर्जाशील बन्छ ।
