जाजरकोट । जाजरकोटमा पहिरोको जोखिममा रहेका २ गाउँका १३ परिवारलाई सुरक्षित स्थानमा सारिएको छ । भूकम्पका कारण जोखिममा रहेका जाजरकोटको भेरी नगरपालिका–१ च्याउपानीका स्थानीयवासीलाई सुरक्षित स्थानमा सारिएको हो ।
गत कात्तिक १७ गते रामीडाँडा केन्द्रविन्दु भएर गएको भूकम्पले सो स्थानलाई बस्न जोखिम बनाएको थियो । जिल्ला प्रहरी कार्यालय जाजरकोटको सहयोगमा सो गाउँका ११ परिवारलाई पहिरोबाट जोगाउन सुरक्षित ठाउँमा सारिएको हो ।
भेरी नगरपालिका –१ च्याउपानीका पहिराको उच्च जोखिममा रहेका ११ घरपरिवारलाई अन्यत्र सारिएको जिल्ला प्रहरी कार्यालयका प्रहरी प्रमुख डिएसपी पुरुषोत्तम प्रसाद पाण्डेले जानकारी दिए । ती मध्ये ६ परिवारलाई भेरी–१ मैदेगाउँको खुला चौर र अन्यलाई तत्कालका लागि आफन्तकहाँ बस्ने व्यवस्था मिलाएको डिएसपी पाण्डेको भनाई छ ।
त्यसैगरी भेरी नगरपालिका ३ चंखेलीडाँडा बस्ने पहिरोको जोखिममा रहेका २ परिवारलाई समेत सुरक्षित स्थानमा सारिएको छ । उच्च जोखिममा रहेका राधिका विक र कल्पना विकको परिवारलाई त्रिभुवन माविको चौरमा अस्थायी रुपमा बस्ने व्यवस्था गरिएको प्रहरीले जनाएको छ ।
भूकम्पका कारण नलगाड नगरपालिकाका २१ वटा बस्ती पहिरोको उच्च जोखिममा परेका छन् । त्यसैगरि कुशे गाउँपालिकामा १८, शिवालय गाउँपालिकामा १, जुनीचाँदे गाउँपालिकामा ६, भेरी नगरपालिकामा ११, बारेकोट गाउँपालिकामा १० र छेडागाड नगरपालिकामा ७ वटा बस्ती पहिरोको उच्च जोखिममा रहेको जिल्ला विपत् व्यवस्थापन केन्द्र जाजरकोटले बताएको छ ।
