जाजरकोट । जाजरकोटमा भएको छुट्टाछुट्टै गाडी दुर्घटनामा २० जना यात्रु घाइते भएका छन ।
भेरी नगरपालिका ७ स्याउली बजारबाट नेपालगञ्ज जाँदै गरेको बा ५ ख १८९२ नम्बरको फोर्स गाडी आज विहान साढे ११ बजेतिर दुर्घटना भएको हो । गाडी मध्यपहाडी राजमार्ग अन्तरगत कुदुको जिरो प्वाइट नजिक सडकबाट करीब ५० मिटर तल खसेको प्रहरीले जनाएको छ । प्रहरीका अनुसार दुर्घटनामा १० बालबालिका सहित १७ जना घाइते भएका छन ।
दुर्घटनामा गम्भिर घाइते भएकाहरुलाई उपचारका लागि जिल्ला अस्पताल जाजरकोट पठाइएको जिल्ला प्रहरी कार्यालय जाजरकोटका प्रमुख डिएसपी पुरुषोत्तम प्रसाद पाण्डेले जानकारी दिए । डिएसपी पाण्डेका अनुसार सामान्य घाइतेहरुको कुदु स्थित स्वास्थ्य चौकीमा उपचार भइहेको छ ।
यस्तै बारेकोट गाउँपालिकाको लिम्साबाट जिल्ला सदरमुकाम खलंगा आउँदै गरेको घ १ ज ५९५ नम्बरको बोलेरो जीप नलगाड नगरपालिका ४ बाउसेखोला नजिक दुर्घटना भएको छ । उक्त दुर्घटनामा ३ जना यात्रु घाइते भएका छन ।
जीपमा सवार ७ जना मध्य गम्भिर चोट लागेका ३ जनालाई उपचारका लागि जिल्ला अस्पताल जाजरकोट पठाइएको प्रहरीले जनाएको छ । सडकमै जीप पल्टिएर घाइते भएका तीनैजना बारेकोट गाउँपालिका २ लिम्साका रहेका छन ।
बाउसेखोलाको दुर्घटना गाडीको ब्रेक फेल भएर भएको भनिएपनि कुदुको दुर्घटनाको कारण खुल्न नसकेको प्रहरीको भनाई छ ।
