जाजरकोट । वित्तिय सुशासन र कार्यसम्पादन मुल्याङ्कनमा भेरी नगरपालिका पहिलो भएको छ । जिल्ला समन्वय समितिले आर्थिक वर्ष २०८०।८१ मा गरेको मुल्याङ्कनमा जाजरकोटका ७ वटा स्थानीय तहहरु मध्ये भेरी नगरपालिकाको बेरुजू सबै भन्दा कम देखिएको हो ।
महालेखापरीक्षकको कार्यालयको प्रतिवेदन अनुसार भेरी नगरपालिका कर्णालीका उत्कृष्ट १० मध्ये ७ औ नम्बरमा रहेको छ । कर्णालीका उत्कृष्ट १० मध्ये पहिलो रहेको सल्यानको बनगाड कुपिण्डे नगरपालिकाको बेरुजू ०.४४ प्रतिशत रहँदा भेरी नगरपालिकाको ०.९८ प्रतिशत रहेको छ ।
हालसम्म सम्परिक्षण गरेको तथ्याङ्कलाई आधार मान्ने हो भने आफुहरुको बेरुजू प्रतिशत घट्ने भेरी नगरपालिकाका प्रमुख प्रशासकीय अधिकृत दलबहादुर घर्तीले बताए । त्यसपछि आफ्नो नगरपालिका कर्णालीको उत्कृष्ट हुने प्रमुख प्रशासकीय अधिकृत घर्तीको भनाई छ ।
त्यसैगरी कार्य सम्पादन मुल्याङ्कनमा पनि भेरी नगरपालिका जिल्लामा पहिलो भएको छ । राष्ट्रिय प्राकृतिक तथा वित्त आयोगले गरेको मुल्याङ्कनमा ७ वटा पालिका मध्ये भेरी नगरपालिका पहिलो भएको हो ।
वित्त तथा प्रशासनिक क्षेत्रमा भेरीले सहिबाटो समातेकोले यो परिणाम आएको नगर प्रमुख चन्द्रप्रकाश घर्तीले बताए । ‘हामी कानूनलाई मिचेर केहि काम गर्दैनौ, सबै कुरा पार्दर्शी भएर समयमै गर्छौ । यसले गर्दा हाम्रो पोजिसन सुधारिदै गएको हो’ नगर प्रमुख घर्तीको भनाई छ ।
