जाजरकोट । जाजरकोटमा एसईई परीक्षा २०८१ को नतिजा उत्साहजनक देखिएको छ । यस वर्षको एसईई परीक्षामा जिल्लाभरका ४ हजार ३ सय विद्यार्थी सहभागी भएका थिए । जसमध्ये १२२ जनाले सबैभन्दा उच्च ग्रेड ‘ए प्लस’ हासिल गरेका छन् ।
शिक्षा विकास तथा समन्वय इकाई जाजरकोटले दिएको विवरण अनुसार जिल्लाको एसईइको नतिजा अघिल्ला वर्षहरूको तुलनामा केही सुधारोन्मुख देखिएको हो । यस वर्ष ‘ए’ ग्रेड प्राप्त गर्ने विद्यार्थीको संख्या १ हजार ७९ पुगेको छ भने ‘बी प्लस’ ल्याउने विद्यार्थी १ हजार ६ सय ३३ जना छन ।
त्यस्तै ‘बी’ ग्रेड प्राप्त गर्ने विद्यार्थी ६ सय ५८ जना रहेका छन् भने ‘सी प्लस’ ल्याउने विद्यार्थी संख्या ३९ रहेको छ । ‘सी ग्रेड’ मा ७ सय ६३ विद्यार्थी परेका छन् भने ‘डी ग्रेड’ ल्याउने विद्यार्थी ६ जना मात्रै छन् । यसले नतिजा औसत भन्दा माथि रहेको देखिन्छ ।
इकाईका प्राविधकि सहायक दलबिर पुनका अनुसार, यो नतिजा जिल्लाभर सञ्चालन गरिएको शिक्षाको गुणस्तर सुधार कार्यक्रम, पठनपाठनमा बढेको नियमितता तथा विद्यार्थीहरूमा बढ्दो आत्मविश्वासको नतिजा हो । उनले भने, ‘यस पटकको नतिजा अघिल्लो वर्षभन्दा सकारात्मक छ, तर अझ मेहनत गर्न बाँकी छ ।’
जिल्लाका विद्यालयहरूमा विद्यार्थीको नतिजालाई थप सुधार गर्ने उद्देश्यले अभिभावक–सहभागितामा आधारित कार्यक्रम, शिक्षण तालिम र अनुगमनलाई अझ प्रभावकारी बनाउन आवश्यक छ ।
