जाजरकोट । भेरी नगरपालिका जिल्लाकै पोषणमैत्री नगरपालिका बन्ने भएको छ । पालिकालाई नै पोषणमैत्री बनाउने उद्देश्यका साथ वडा नं. १३ र ९ लाई औपचारिक रूपमा पोषणमैत्री वडा घोषणा गरिएको छ।
नेपाल सरकारले तोकेको ४९ वटा पोषण सूचकहरू पूरा गरेपछि वडा नं. १३ लाई जिल्लाकै पहिलो तथा वडा नं. ९ लाई जिल्लाकै दोस्रो पोषणमैत्री वडाका रूपमा घोषणा गरिएको हो । जनप्रतिनिधि, स्वास्थ्य संस्थाहरू, महिला समूह, समुदायका अगुवा तथा विभिन्न संघसंस्थाको समन्वय र सक्रियताले यो उपलब्धि हासिल भएको नगरपालिकाले जनाएको छ ।
वडाध्यक्ष हिराप्रसाद शर्माका अनुसार पोषण क्षेत्रमा देखिएका कमजोरीहरू पहिचान गरी निरन्तर अनुगमन, सचेतना कार्यक्रम र सेवाको पहुँच विस्तारसँगै परिणाममुखी कार्यान्वयन गरिएको थियो । “बालबालिकाको वृद्धि विकास, गर्भवती तथा सुत्केरी महिलाको अवस्था सुधार, पोषणयुक्त खाना तथा सरसफाइको प्रवर्धन जस्ता क्षेत्रमा वडाले प्राथमिकता दिएको थियो,” शर्माले बताए ।
पोषणमैत्री वडा बन्नका लागि सूनिश्चित गरिनुपर्ने सूचकहरूमा बालबालिकाको तौल र उचाइ अनुसारको अवस्था, नियमित खोप सेवा, स्तनपान, आयोडिनयुक्त नुन प्रयोग, सरसफाइ, विद्यालयमा पोषण शिक्षा, कुपोषणको पहिचान र उपचार, किशोरी तथा महिलामा रगतको कमी न्यूनीकरण लगायतका सूचकहरू पर्दछन।
यो घोषणापछि वडामा थप योजनाबद्ध रुपमा पोषण सुधारका कार्यक्रमलाई निरन्तरता दिने योजना रहेको १३ का वडाध्यक्ष यज्ञबहादुर बटालाले जानकारी दिए ।
वडा नं १३ र ९ को सफलताको सराहना गर्दै अन्य वडाहरूले पनि यही बाटो अवलम्बन गर्ने र सबै वडाहरू पनि पोषणमैत्री बनेपछि नगरपालिकालाई नै पोषणमैत्री पालिका घोषणा गर्ने लक्ष्य रहेको प्रमुख प्रशासकीय अधिकृत दलबहादुर घर्तीले जानकारी दिए ।
