जाजरकोट। भेरी नगरपालिकाका १३ वटै वडामा अनलाइन प्रणालीबाट नागरिकताको सिफारिस सुरु गरिएको छ । जिल्लाका ७ वटा स्थानीय मध्य सबै वडामा अनलाइन प्रणालीबाट नागरिकताको सिफारिस गर्नेमा भेरी नगरपालिका पहिलो स्थानीय तह बनेको छ ।
भेरी नगरपालिकाका सबै वडा र जिल्लाका अन्य स्थानीय तहका अधिकांश वडाहरूमा अनलाइन प्रणालीबाट नागरिकताको सिफारिस गर्न सुरू भएको जिल्ला प्रशासन कार्यालय जाजरकोटले जनाएको छ । अनलाइन प्रणाली सुरु भएपछि अभिलेखीकरणमा सहजता, छरितो र प्रविधिमैत्री सेवा प्रवाह हुने, झुटा र किर्ते विवरण भरेर नागरिकता लिने कार्य रोकिने हुँदा यो सेवा प्रभावकारी हुने विश्वास लिइएको छ ।
नगरपालिकाले वडा नं ६ बाट जिल्लामा पहिलो पटक अनलाईन प्रणालीबाट नागरिकताको सिफारिस गर्ने कार्यको सुरूवात गरेको थियो । हाल १३ वटै वडामा एकैसाथ अनलाइन प्रणालीबाट नागरिकताको सिफारिस सुरु भएको नगर प्रमुख चन्द्र प्रकाश घर्तीले बताए । वडा कार्यालयमा आवश्यक कागजपत्र लिएर गएपछि अनलाइनमार्फत नागरिकताको प्रमाणपत्रका लागि सिफारिस हुने उनले बताए ।
यस प्रणाली लागू भएपछि सेवाग्राहीले छिटोछरितो रुपमा नागरिकता प्राप्त गर्न सक्छन् भन्नेमा आफू विश्वस्त रहेको नगर प्रमुख घर्तीको भनाइ छ । । सबै वडा सचिव कर्मचारीलाई अनलाइन सिस्टममा विवरण अद्यावधिक गर्दा हुन सक्ने त्रुटिका बारेमा सावधानीपूर्वक काम गर्न नगरप्रमुख घर्तीको आग्रह छ ।
सबै वडाका वडा सचिव तथा कर्मचारीहरूको विद्युतिय प्रयोग खाता बनाएर अनलाइन प्रणालीबाट नागरिकता सिफारिस सुरू गरिएको नगरपालिकाका सूचना प्रविधि अधिकृत सुर्य प्रसाद लम्सालले जानकारी दिए ।
यो प्रणाली लागु भएसँगै अब नयाँ नागरिकता प्राप्तिका लागि निवेदन दिने सेवाग्राहीले नागरिकता लिन आवश्यक पर्ने सिफारिसका पत्रहरु बोकेर जिल्ला, इलाका प्रशासनमा बुझाउनुपर्ने झञ्झट हट्नेछ । सफ्टवेयर प्रणालीमा प्रविष्ट भएका विवरणहरु गृह अन्तर्गत नागरिकता फाँट विभागमा रजिष्टेशन कोडका आधारमा सहजै नागरिकता पाउन सकिन्छ।
