खलंगा । जाजरकोटमा १६ औँ जिल्ला स्तरीय राष्ट्रपति रनिङ शील्ड प्रतियोगिता सम्पन्न भएको छ । यहि बैशाख ४ गतेदेखि बारेकोट गाउँपालिका ६ स्थित सीता मावि कार्कीजिउलामा सुरू भएको प्रतियोगिता आज सम्पन्न भएको हो ।
जिल्लाका ७ वटै स्थानीय तहहरूको सहभागिता रहेको उक्त प्रतियोगिताको उपाधि भेरी नगरपालिकाले जितेको छ । १० स्वर्ण, १२ रजत र २ कास्य सहित भेरी नगरपालिका प्रथम भएको हो । ७ स्वर्ण, २ रजत, ७ कास्य पदक सहित नलगाड नगरपालिका द्वितिय भएको छ भने कुशे गाउँपालिकाले ६ स्वर्ण, २ रजत, ५ कास्य पदक जित्दै तेश्रो स्थान हात पारेको छ ।
त्यस्तै छेडागाड नगरपालिका र शिवालय गाउँपालिकाले समान ३ स्वर्ण, ४ रजत, ४ कास्य पदक जितेका छन भने जुनिचाँदे गाउँपालिकाले १ स्वर्ण, २ रजत, ४ कास्य पदक जितेको छ । स्वर्ण पदक विहिन भएको प्रतियोगिताको व्यवस्थापक बारेकोट गाउँपालिकाले ४ रजत र ६ कास्य पदकमा चित्त बुझाउनु परेको छ ।
यस अघि छेडागाड नगरपालिकाले लगातार उक्त प्रतियोगिताको उपाधि जितेको थियो ।
प्रतियोगितामा खेलाडीहरूले उत्कृष्ट प्रदर्शन गरेका छन । विभिन्न ३० विधाका खेलहरू समावेश गरिएको प्रतियोगितामा सहभागी खेलाडीहरूले उत्साहजनक प्रतिस्पर्धा गर्दै आफ्नो प्रतिभा प्रदर्शन गरेका थिए ।
यस प्रतियोगिताले जिल्लामा खेलकुद विकास, प्रतिभा पहिचान तथा खेलाडीहरूको मनोबल वृद्धि गर्न महत्वपूर्ण योगदान पुर्याउने विश्वास गरिएको छ।
जिल्ला खेलकूद विकास समितिका अध्यक्ष नरबहादुर बस्नेतको अध्यक्षतामा सम्पन्न समापन कार्यक्रममा बारेकोट गाउँपालिकाका अध्यक्ष बीरबहादुर गिरी सहित सबै पालिकाका प्रतिनिधी, जिल्ला खेलकुद कार्यालयका प्रमुख जयप्रसाद आचार्य र स्थानीयहरूको समेत सहभागिता रहेको थियो ।
यस प्रतियोगितामा उत्कृष्ट खेल प्रतिभा प्रदर्शन गर्ने खेलाडीहरू प्रदेश स्तरीय प्रतियोगिताका लागि छनोट गरिने अध्यक्ष बस्नेतले बताए ।
