जाजरकोट । जिल्लाका विपन्न तथा सिमान्तकृत समुदाय संलग्न सहकारीहरुलाई लेखा तथा व्यवस्थापन तालिम दिइएको छ । सामाजिक विकास कार्यालयको लोपोन्मुख तथा सीमान्तकृत समुदायको लागि सचेतना अभिबृद्धि तथा अभिमूखिकरण तालिम कार्यक्रम अन्तरगत भिभिन्न १२ वटा सहकारीका अध्यक्ष, सचिव र कोषाध्यक्षहरुलाई ३ दिने लेखा तथा व्यवस्थापन तालिम दिइएको हो ।
लक्षित वर्ग विषेश कार्यक्रम अन्तरगत कार्यालयबाट विउपुँजी प्राप्त गरेका सहकारीहरुका पदाधिकारीहरुलाई ३ दिने तालिम प्रादन गरिएको कार्यालय प्रमुख यज्ञश्वर खत्रीले बताए । प्रमुख खत्रीका अनुसार सहकारीहरुको उद्देश्य अनुरुप लेखा प्रणालीको अवलम्बनका साथै अन्य व्यवस्थापकीय पक्षको सुधारका लागि तालिमको आयोजना गरिएको हो ।
सहकारी अभियान्ता राजु केसी, प्रकाश कुमार चन्द लगायतले तालिमको सहजिकरण गरेका थिए । तालिमको समापन कार्यक्रममा बोल्दै नौमुले महिला सहकारी संस्था कुशेकी अध्यक्ष बबिता चदाराले सहकारी संचालन गरेपनि यस सम्बन्धी सैधान्तिक ज्ञान नहुँदा समस्या झेल्दै आएकोमा तालिमबाट महत्वपूर्ण ज्ञान प्राप्त भएको बताइन ।
