सुर्खेत । कर्णाली प्रदेश सरकारबाट नेकपा (माओवादी केन्द्र) बाट सरकारमा सहभागी मन्त्रीहरुले राजिनामा दिएका छन् । सोमबार नेकपा एमाले नेतृत्वको सरकारमा माओवादीबाट सहभागी ४ मन्त्रीले राजीनामा दिएका हुन् ।
केन्द्रमा दुई ठूला दल नेपाली कांग्रेस र एमालेबीच नयाँ समीकरण बनेसँगै एमाले नेता यामलाल कँडेल नेतृत्वको प्रदेश सरकारमा माओवादीबाट सहभागी आर्थिक मामिला तथा योजनामन्त्री महेन्द्रबहादुर केसी, उद्योग, पर्यटन, वन तथा वातावरण मन्त्री दुर्गबहादुर रावत, ऊर्जा तथा जलस्रोतमन्त्री रणसिंह परियार र सामाजिक विकासमन्त्री वीरबहादुर शाहीले मुख्यमन्त्री यामलाल कँडेल समक्ष राजिनामा बुझाएका हुन् ।
मन्त्रीहरुले राजिनामा दिएपनि माओवादीले सरकारलाई दिएको समर्थन भने फिर्ता लिएको छैन । माओवादी संसदीय दलका नेता एवम् पूर्वमुख्यमन्त्री राजकुमार शर्माले सरकारबाट बाहिरिने विषयमा निर्णय गरेका छैनन् ।
राजिनामा पश्चात आयोजित पत्रकार सम्मेलनमा आर्थिक मामिला तथा योजना मन्त्री महेन्द्र केसीले सरकारलाई दिएको समर्थन फिर्ता लिने विषय संसदीय दलले निर्णय गर्ने बताए ।
